Wednesday, 21 November 2018

ශබ්ද දූෂණයට එරෙහිව පැමිණිලි කිරීමට.... මාතර පොලීසියට ගියෙමි.


මම :- ලවුඩ් ස්පීකර් බලපත්‍ර ගන්නේ කොතනින්ද ?
පිළිගැනීමේ නිලධාරි :- බලපත්‍ර අංශයට යන්න...
එහි ගියෙමි
මම : - ලවුඩ් ස්පීකර් බලපත්‍ර ලබා ගැනීම පිලිබඳ කරුණු ටිකක් දැනගන්න පුළුවන්ද ?
බලපත්‍ර අංශය භාර නිලධාරිණිය :- පුළුවන්...මොනවගේ දේවල්ද ?
මම : - බලපත්‍රයක් නොගෙන ලවුඩ් ස්පීකර් භාවිතා කරන්න මට පුළුවන්ද ?
බලපත්‍ර අංශය භාර නිලධාරිණිය :- බැහැ...කොහෙත්ම බැහැ...
මම : - මම එහෙම කලොත් මොනවද පොලීසියට කරන්න පුළුවන් ?
බලපත්‍ර අංශය භාර නිලධාරිණිය :- මහත්තයා කව්ද ?
මම : - විශ්‍රාමික රජයේ සේවකයෙක්
බලපත්‍ර අංශය භාර නිලධාරිණිය :- මොනවද කලේ ?
මම : - මම දොස්තර කෙනෙක්...නාවික හමුදා නිලධාරියෙක්
බලපත්‍ර අංශය භාර නිලධාරිණිය :- ඔබතුමා බලපත්‍රයක් නොගෙන ලවුඩ් ස්පීකර් භාවිතාකලොත්...ඒ උපකරණ අපි අත්අඩංගුවට අරගෙන... ඔබතුමාගෙන් කටඋත්තරයක් අරගෙන නඩු දානවා
මම : - මුස්ලිම් පල්ලි වලටත් ලවුඩ් ස්පීකර් භාවිතා කරන්න බලපත්‍ර ගන්න ඕනෙද ?
බලපත්‍ර අංශය භාර නිලධාරිණිය :- ඔව්...ඕනම කෙනෙක්ට මේ නීතිය අදාලයි
මම :- දැනට මාතර තියෙන මුස්ලිම් පල්ලි ඔක්කොම මේ විදියට බලපත්‍ර ලබාගෙන තියෙනවද ?
බලපත්‍ර අංශය භාර නිලධාරිණිය :- ඒ ගැන හොයල බලල ඕනෙ කියන්න
මම :- බලපත්‍ර කොන්දේසි මොනවද ?
බලපත්‍ර අංශය භාර නිලධාරිණිය :- රෑ දහයෙන් පස්සේ ස්පීකර් භාවිතා කරන්න තහනම්...සංගීත සංදර්ශන, දේශපාලන රැස්වීම් වලට රෑ 12 වෙනකම් අවසර දෙනවා...අනිත් අයට සිකුරාදා සෙනසුරාදා දවස් දෙකේ විතරක් රෑ 12 වෙනකම් අවසර දෙනවා.
මම :- පන්සල් වලටත් ලවුඩ් ස්පීකර් භාවිතා කරන්න බලපත්‍ර ගන්න ඕනෙද ?
බලපත්‍ර අංශය භාර නිලධාරිණිය :- ඔව්
මම :- රෑ දහයේ නීතිය පන්සල් පල්ලි වලටත් අදාලද ?
බලපත්‍ර අංශය භාර නිලධාරිණිය :- ඔව් අදාලයි
මම :- ලවුඩ් ස්පීකර් බලපත්‍රයක් ලබාගෙන මගේ ඉඩමේ ලවුඩ් ස්පීකර් හයිකරල ඉවරවෙලා...පාරේ තියෙන ලයිට්කණු වලත් ලවුඩ් ස්පීකර් හයිකරන්න මට පුළුවන්ද ? 
බලපත්‍ර අංශය භාර නිලධාරිණිය :- එහෙමකරන්න බෑ ඒක නීති විරෝධියි...එහෙම කලොත් අපි වහාම බලපත්‍රය අවලංගු කරනවා
මම :- ලවුඩ් ස්පීකර් බලපත්‍ර නිකුත්කිරීමේදී ශබ්ධ දූෂණය නිසා මහජනතාවට එයින් හිරිහැරයක් වෙනවද කියල සොයාබැලීමක් කරනවද ?
බලපත්‍ර අංශය භාර නිලධාරිණිය :- නැහැ...එහෙම සොයාබලන්නේනෑ
මම :- දැන් මගේ ගෙදරළඟ පන්සලේ කඨින පිංකම නිසා දවස් තුනක් තිස්සේ දවල් රෑ දෙකේම...විශාල සද්දයකින් ලවුඩ් ස්පීකර් වලින් පිරිත්, බොදුබැතිගී, කවිබණ, මව්පිය වන්දනා, ආසන දෙකේ බණ, විරිදු ප්‍රචාරය කරනවා...පාරෙත් ලවුඩ් ස්පීකර් 10ක් හයිකරල තියෙනවා...මේ ලවුඩ් ස්පීකර් අත්අඩංගුවට අරෙගෙන පන්සලේ භාර කාරිත්වයට විරුද්ධව නඩුවක් දාන්න පුළුවන්ද ?
බලපත්‍ර අංශය භාර නිලධාරිණිය :- මේක මට විසඳන්න බෑ...ඔබතුමා පාලණ අංශය භාර...පොලිස් පරීක්ෂක ධම්මික රාජපක්ෂ මහත්තයට මේ ගැන පැමිණිලි කරන්න.
පාලණ අංශයට යයි...
පොලිස් පරීක්ෂක ධම්මික රාජපක්ෂ :- මොකක්ද ප්‍රශ්ණය ?
මම :- පැමිණිල්ල නැවතත් ඉදිරිපත් කලෙමි...ඔහු අවධානයෙන් සවන්දෙයි...
පොලිස් පරීක්ෂක ධම්මික රාජපක්ෂ :- පැමිණිලි අංශයේ CI අනිල් හම්බවෙලා පැමිණිල්ලක් දාන්න
ප්‍රධාන පොලිස් පරීක්ෂක අනිල් :-මොකක්ද ප්‍රශ්ණය ?
මම :- පැමිණිල්ල තුන්වන වරටත් විස්තර ඇතුව ඉදිරිපත් කලෙමි...
ප්‍රධාන පොලිස් පරීක්ෂක අනිල් :- මේක පංසලේ කඨින පිංකම ඒකට බලපත්‍ර නිකුත් කරල තියෙන්නේ. ඒගැන මොනවත් කරන්න බෑ. ඔය වගේ කතා කරනවානම්...එයාපෝට් එක වටෙයි...රේල් පාරදිගෙයි ඉන්න මිනිස්සු සද්දෙ ගැන පැමිණිලි කරාම එයාපෝට් එක වහනවද ? රේල් පාරෙ කෝච්චි යනඑක නවත්තනවද ? රෑට පිරිත් දාන එක ගමටම ආශීර්වාදයක්...බොදු බැතිගී අහං ඉන්න බැරි අමාරුව මොකක්ද ? අල්ලපු ගෙදර බෆල් වල සද්දෙ වැඩිනම් ඒවගේදේවල් අපට නවත්තන්න පුළුවන්...දැන් කඨින පිංකම නවත්ටන්න කියලද ඔයා කියන්නේ. 
මම:- මට මේ ගැන පැමිණිලි කරන්න ඕනේ...
ප්‍රධාන පොලිස් පරීක්ෂක අනිල් :- හරි මම දැන් හාමුදුරුවොයි දායක සභාවයි මිනිස්සුයි ඔක්කොම මෙතැනට ගෙන්නනවා...ඔයාට ගමෙත් ඉන්න බැරිවෙයි 
මම:- ඔය හැමෝගෙන්ම ගුටිකෑවොත් මං මැරෙයි...මං යනවා... 
ප්‍රධාන පොලිස් පරීක්ෂක අනිල් :- මේ...මේ...මහත්තයා ඔයාගෙ පදිංචිය වෙනස් කරන්න බලන්න...
මම: ස්තුතියි.

Saturday, 13 October 2018

මේ කුමන වර්ගයේ දේශයක්ද ?

මේ කුමන වර්ගයේ දේශයක්ද ?
මම නව නිපැයුම්කරුවෙකි. මට දැනට ශ්‍රී ලාංකික පේටන්ට් දෙකක් තිබේ. තව පේටන්ට් තුනක් සඳහා ඉල්ලුම් කර ඇත. දැනට ලෝකයේ සාදා ඇති සමහර උපකරණ වඩාත් වැඩි දියුණුකර අපට ඒ සඳහා පේටන්ට් ලබා ගත හැකිය. මගේ Multi Purpose Electric Fence Enagizer එක එවැන්නකි. https://vimeo.com/39816263 පුද්ගලික විදුලිවැටවල් 184ක් ලබාදී ගල්ගමුවේ වල්අලි ප්‍රශ්නය සෑහෙන දුරකට විසඳීමට මට හැකිවිය. https://www.youtube.com/watch?v=zk0HrgWHg4w&app=desktopලංකාව පුරා ගොවීන්ට අලින්, හරකුන් ඌරන් මොණරුන්,වැලිමුවන් ඉත්තෑවන්, වඳුරන් හා රිලවුන් වැනි වනසතුන්ගෙන් වගාව ආරක්ෂා කරගැනීම සඳහා විදුලිවැට එනජයිසර් 485 ක් මාවිසින් ලබාදී ඇත කෘෂිකර්ම අමාත්‍යාංශයටද 25ක් දුන් නමුත් මාසතුනක් ගතවීත් මුදල් ගෙව්වේ නැත. වගාවන් විනාශවෙනවා දැක ජනපතිතුමා හඬාවැටෙයි. එයදුටු විට මටත් ඇඬෙයි.
විද්‍යා හා තාක්ෂණ අමාත්‍යාංශය යටතේ ඇති නව නිපැයුම්කරුවන්ගේ කොමිසම මගින් පවත්වනලද 2013 තරඟයේදී හොඳම වාණිජකරණය කරණය කරනලද නව නිපැයුම සඳහා රන් පදක්කම සහ සහතිකය දිනා ගන්නා ලද්දේ මා විසිනි.ඒ සඳහා කිසිදු මුදල් ත්‍යාගයක් මාහට ලැබුණේ නැත. මෙම වසරේදී එම ත්‍යාගය සඳහාම රුපියල් ලක්ෂ අටක පමණ මුදලක් ලබාදුන් බව දැන ගන්නට ලැබුනි.
2012 වර්ෂයේදී මිනිසුන් අනාරක්ෂිත රේල් ගේට්ටු වලදී අනතුරු වලට ලක්වී මිය යෑම වැළැක්වීම සඳහා සම්පූර්ණ ස්වයංක්‍රීය රේල් ගේට්ටුවක් මා විසින් නිපදවන ලදී. මේ සඳහා මගේ විශ්‍රාම පාරිතෝෂිකයෙන් ලැබුණු මුදලින් රුපියල් ලක්ෂ හතර හමාරක් පමණ මාවිසින් වැය කරන ලදී.
දුම්රිය දෙපාර්තමේන්තුව මෙම ස්වයංක්‍රීය රේල් ගේට්ටුව පරීක්ෂා කිරීම සඳහා වත් භාරගත්තේ නැත. මගේ හිතවත් පොලිසියේ SSP මහතෙකුගේ උදව්වෙන් මෙය වවුනියාවේදී අත්හදා බලන ලදී. https://www.youtube.com/watch?v=4Z7KLt4GyQ0 . මා විසින් නාවික හමුදාව සඳහා නිපදවන ලද ස්වයංක්‍රීය බෝට්ටුව ඔබට නැරඹිය https://www.youtube.com/watch?v=YKDu347vfp4 හැකිය. මා විසින් නිපදවන ලද අරුම පුදුම බයිසිකලය https://www.youtube.com/watch?v=aSWBajv1cQA&t=46sඅන්තිමේදී දුම්රිය දෙපාර්තමේන්තුව විසින් වීසි කරන ලද රේල් ගේට්ටුවේ බැරියර් දෙක කපා ගෙදර පාවිච්චිය සඳහා ඇලුමිනියම් ඉනිමගක් හැදුවෙමි.
මගේ අලුත්ම නව නිපැයුම බෙහෙත් ද්‍රව්‍ය, එන්නත් වර්ග, රුධිරය, අක්මා වකුගඩු ආදී ශරීර කොටස් ගබඩා කර ඇති ශීතකරණ...විදුලිය බිඳ වැටීම්, ශීතකරණය අක්‍රියවීම වැනි අවස්ථා වලදී දුරකථන පණිවිඩයක් සහ SMS පණිවුඩයක් මගින් අදාළ නිලධාරීන්ට දැනුම් දෙන එකකි. එම SMS පණිවිඩයේ ශීත කරණයේ දැනට පවතින උෂ්ණත්වයද සටහන් වෙයි. විදුලිබලය යථාවත්වූ පසු එයද...දුරකථන පණිවිඩයක් සහ දැනට පවතින උෂ්ණත්වයද SMS පණිවුඩයක් මගින් දැනුම් දෙයි. ඒසඳහා මාවිසින් පේටන්ට් බලපත්‍ර අයදුම්කර තිබේ. මෙය අප්‍රිකාව වැනි රටවලටද අපනයනය කළහැකි අන්දමට උසස් ඩිජිටල් ඉලෙක්ට්‍රොනික් තාක්ෂනය භාවිතාකර නිපදවා ඇත. මාතර ප්‍රාදේශීය සෞක්‍ය සේවා අධ්‍යක්‍ෂ තුමාගේ කාරුණික අනුග්‍රහයෙන් පරීක්ෂාව සඳහා එකක් මාතර පොල්හේන බෙහෙත් ගබඩාවේ සවිකර ඇත. එය හොඳින් ක්‍රියාකරයි. සෞක්‍ය දෙපාර්තමේන්තුවේ ශීතකරණ බාර ප්‍රධාන වසංගත රෝග විද්‍යාඥ නිලධාරියාට එය පෙන්වීමට ගියවිට එය පරීක්ෂාකර බැලීමටවත් ඔහු උනන්දු වූයේ නැත. දේශීයව නිපදවන ප්‍රමිති සහතික නොමැති එවැනි උපකරණ පරීක්ෂාව සඳහාවත් බාරගත නොහැකිබව ඔහු අපට දැන්වීය. ප්‍රමිති සහතික නොමැති ජොනී බට්ටා... කකුල් දාහකටත් වඩා...ඉහලම ප්‍රමිතියෙන් කඩා දැම්මේය.
බොහෝ MOH කාර්යාලවල ශීතකරණ සති අන්තයේදී අනාරක්ෂිතව තිබේ. විදුලිය බිඳවටීමකදී එය වහාම දැනුම්දීම නිසා කෝල්ඩ් පැක්ස් දමා එම එන්නත් වෙනත් ආයතනයක ශීතකරණයකට මාරු කර බේරා ගත හැකිය. දැන් කරන්නේ එම ලක්ෂගනනක් වටිනා එන්නත් වීසිකර දැමීමයි. මේ මහජන මුදල්ය. පිංවතුන් දන්දෙන රුධිරයද එසේ ඉවත දමන අවස්ථා ඇත. මෙම උපකරණ සඳහා අවශ්‍ය ප්‍රමිති සහතිකය සහ උපදෙස් ලබා ගැනීමට ශ්‍රි ලන්කා ප්‍රමිති ආයතනය, නවනිපයුම් කරුවන්ගේ කොමිසම, ජාතික විද්‍ය පදනම, විද්‍යා සහ තාක්ෂණ අමාත්‍යාංශය යන ආයතන වලට ගියෙමු...පහත දැක්වෙන ආයතන එම අමාත්‍යාශයට අයත්ය
Industrial Technology Institute
National Engineering Research and Development Centre
National Institute of Fundamental Studies
National Research Council
National Science Foundation
National Science and Technology Commission
Sri Lanka Accreditation Board for Conformity Assessment
Sri Lanka Inventors Commission
Sri Lanka Standards Institution
Sri Lanka Institute of Nanotechnology (pvt) Ltd (SLINTEC)
නමුත් සියල්ල එකතුකලවිට උත්තරය බිංදුවය...
නවනිපයුමක් පරීක්ෂාකර එයට සහතිකයක් දෙන්නට කෙනෙක් නැත...
කෘෂිකර්ම අමාත්‍යංශයට අයත් ආයතන
Department of Agriculture
Department of Agrarian Development
Agricultural & Agrarian Insurance Board
Hector Kobbekaduwa Agrarian Research and Training Institute (HARTI)
Sri Lanka Council for Agricultural Research Policy(CARP)
Institute of Post Harvest Technology (IPHT) J
National Food Promotion Board
Colombo Commercial Fertilizer Co.Ltd
Ceylon Fertilizer Co.Ltd
National Fertilizer Secretariat
සියල්ල එකතුකලවිට උත්තරය බිංදුවය....
අන්තිමේදී විකුණාගත නොහැකිව වට්ටක්කා ටික අලින්ට දන්දෙයි
මා මෝටර් රථයෙන් ආවේ මාතර සිටය. බදාදා මහජන දිනයේත් ලොක්කා සීට් එකේ නැත...දෙවෙනියාද නැත...සවස 3 වනවිට බොහෝ පුටු හිස්ව තිබේ. දැවැන්ත බිල්ඩින් ඇතුලේ AC සියගණනක් හෝ ගාලා වැඩය. මහදවාලෙත් ඇතුලේ ලයිට් දමා තිබේ. වාර්ෂික විදුලි බිල් ඉන්ධන වියදම්, ගොඩනැගිලි කුලී කෝටි ගනනිනි. මේ කාණු දිගේ ගලායන්නේ මහජනයාගේ බොටුව මිරිකා ගන්නා බදු මුදල්ය. පිළිගැනීමේ නිලධාරියා ඇතුළු සේවකයින් ගෙන් බාගයක් පලා ගොසිනි. බොහෝ රජයේ කාර්යාලවල තත්වය ඕකය...බොරුනම් ගිහිං බලන්න.
රජයෙන් දුන් ඩියුටිෆ්‍රී වාහනය ගාල්කර නිලරථයෙන් ගිය ලදාරීන් සමහරු ෆීල්ඩ් එකේය අනිත් අය කොන්ෆරන්ස් හෝ පිටරය.
අන්තිමේදී පියන්ට පිංසෙන්ඩුවී ප්‍රමිති ආයතනයේ (SLS) පහල නිලධාරියෙකු හමුවීමට මට හැකිවිය. ඉලෙක්ට්‍රොනික් පර්යේෂණාගාරයක් හෝ නියමිත ඉංජිනේරුවන් නොමැතිනිසා...ඉලෙක්ට්‍රොනික් උපකරණ සඳහා එම ආයතනය ප්‍රමිති සහතික ලබා නොදෙන බවත්...වතුර බෝතල් සඳහා ප්‍රමිති සහතික දෙන බවත් ඔහු මට කිව්වේය. මේ 21වෙනි ශතවර්ෂයේ අපේ ප්‍රමිතිආයතනයයි...ඉතිං අපි ඉලෙක්ට්‍රොනික් උපකරණ නිපදවා වෙනත් රටවලට විකුණා විදේශ විණිමය සොයන්නේ කෙලෙසද ?. නවනිපයුම් කොමිසම මගින් වාර්ෂිකව පවත්වන තරඟයේදී බොහෝ නවනිපයුම් ප්‍රදර්ශනය කෙරේ මේවායින් 70% පමණ ඉලෙක්ට්‍රොනික නවනිපයුම්ය. ඒවාන් දිනන ඒවා ජිනීවාහිදී ප්‍රදර්ශණය කෙරේ. මේක බලන්නට එන සුද්දෝ සහ චීන්නු එම අදහස් ගෙඩිපිටින්ම හොරකං කරගෙන ගොස් වාණිජ මට්ටමින් සාදා ලෝකෙටම විකුණති. හදපු එකාට හුලංය. ප්‍රමිති සහතිකයක් නැති නිසා ලංකාවේවත් විකුණන්නට බැරිය. වාර්ෂකව ලක්ෂ ගණන් මහජන මුදල් ගිලින නව නිපැයුම් කොමිසම කරන සේවය ඕකය. අගමැති හා ජනාධිපති දේශීය කර්මාන්ත කරුවන් නගාසිටුවන අන්දම ගැන පොරටෝක් දෙන අන්දම අපි නිතර නරඹන්නෙමු. ශ්‍රීලංකාවේ නව නිපැයුම් කිරීම ස්වයංවින්දනයේ යෙදෙනවා වැනිය...මට පට්ටම ආතල්ය...අන්තිමේදී දනිස් පණ නැතිවෙයි.
හිඟන අම්මලා අරාබියට විකුනමු....රුපියලට සාපේක්ෂව ඩොලරය පහත බසිමින්තිබේ...ඉල්ලංකාව ආසියාවේ ආශ්චර්යයි...ඔහොමයන්...

Tuesday, 2 October 2018

අම්පාරේ කතා 2

අම්පාරේ කතා 2
කොරොල්ලා කථාවස්තුව
අහුන්ගල්ලේ මගේ DMO සගයා, මම සහ බණ්ඩා සිංහ සමාජයට බඳවා ගන්නා ලදී. ඒ සඳහා උනන්දුවෙන් ක්‍රියාකරේ දයාගමගේ සහ ඔහුගේ සොහොයුරා ගාමිණි විසිණි. ඒ දවස්වල එම සොහොයුරන්ට ව්‍යාපාරයක් වශයෙන් තිබුනේ ඩිලීෂියා හෝටලය නමැති අම්පාර ටවුමේ මැද තිබූ හෝටලය පමණකි. රජයේ කොන්ත්‍රාත් කරමින් ක්‍රමයෙන් ධනවත් ව්‍යාපාරිකයෙක් බවට පත්වූ දයාගමගේ දැන් ප්‍රකෝටිපති ඇමතිකෙනෙකි.
ගුණයහපත් අවිවාහක පුද්ගලයකුවූ ගාමිණී අධික දුම්පානය නිසා හෘදයාබාධයක් සෑදී තරුණ වයසේදීම අකාලයේ මියගියේය.
මසකට වරක් සිංහ සමාජයේ සාමාජිකයෝ රැස්වෙන අතර රැස්වීම අවසානයේ රසවත් කෑම සහිත මධුසාදයක්ද නොවරදවාම පැවැත්වේ. මම විස්කි බ්‍රැන්ඩි වොඩ්කා වැනි ඉහල වර්ග වල මත්පැන් ප්‍රිය කල අතර DMO මචං ප්‍රිය කලේ පට්ටම කසිප්පු ගඳගහන ගල් අරක්කුය. ඔහු ගල් අරක්කු බිව්වේ වතුර බොන ලොකු වීදුරු වලය...ඉස්සෙල්ලම බම්පර් එකක් දාන්න ඕනේ...කියා ලොකු වඩියක් එකවරම කටට හලා ගනී...මම කවදත් මජ්ජපමා දට්ඨානා කෙනෙකි...නාන්න...තිබුනත් අදටත් බොන්නේ ෂොට් දෙකක් පමණකි...මද පමණට වෙරිවී...නැටුම් තෙල් බී...ඔරේ ඩෝප්වූ...එවුන් කියන කතා, නටන නැටුම්, සිංදු කියමින්...හෝටල් දමමින් කරන මළවිකාර බලමින්...ගෝල්ඩ්ලීෆ් ෂියෑට් එකක් බොමින් ආතල් ගැනීම මගේ ආතල් එක විය. ඩෝප්වූ පසු කවුරුන්හෝ සමග කොක්කක් දමාගැනීම DMO මචංගේ සිරිත විය ඩෝප්වූ විට පට්ටම ඇග්රෙසිව්ය...දැනුත් එහෙමය. නමුත් පාසැල් සගයාවූ මට හිතවත්ය. බොනවිට ඔළුව සාක්කුවට වැටෙනකම්ම බීම DMO මචංගේ සිරිතවිය. ඔහු වලිවලට පටලවන්නේ නැතිව පාරේ ඇක්සිඩන්ට් වෙන්නේ නැතුව නිලනිවාසයට රැගෙන ඒමට මම වගබලාගත්තෙමි. ඔහුගේ අනිත් විනෝදාංශය වූයේ ගැහැණුන් දඩයම් කිරීමයි. ඔහු එම කලාවේ පිකාසෝ කෙනෙක් නොහොත් රස්පුටින් කෙනෙක් බව ඔහුට ගෞරවයක් වශයෙන් සඳහන් කරමි. ඉතා ප්‍රතාපවත් කඩවසම් පෙනුමක් තිබූ...අම්පාරේ ඉහල තනතුරක් දරන DMO වෙතට...ගැහැණුන් පහන්දැල්ලට එන පළඟැටියන් මෙන් රංචු පිටින් ඇදී ආහ. ඔහු ප්‍රියකලේ පාසැල් ශිෂ්‍යාවන්ට නොව මැදිවියේ විවාහක ගැහැණුන්ටය. මිනිහා මැරුණු හෝ දික්කසාදවූ සිංගල් මම්ස් ලාට කාරුණික ඔහු නිතර පිහිටවිය.
වරක් සිංහසමාජයේ රැස්වීම පැවැත්වුනේ හිඟුරාන සීනි කම්හලේ ලොක්කාගේ නිලනිවසේය. බොන්නට පෙරැත්ත කරන ඩයල්වලින් බේරීම සඳහා වීදුරුව එකවර හිස්නොකර ටික ටික බීම මගේ සිරිත විය. බොරුවට අනිත් බෙබේ ලාට පෙනෙන්නට වරින් වර වීදුරුවට සෝඩා වත් කර ගත්තෙමි.
මගේ දෙක දාගෙන මම අයින්වූ අතර DMOමචං කරටි කැඩෙන්නට ගැහුවේය. හින්ගුරානේ ලොක්කා අපිට කෑම මේසයට ආරාධනා කළේය... ෆෙලෝෂිප් එකට පසුව සිංහ රංචුව වැනෙමින් කෑම මේසයට වාඩිවී...වල්ඌරු මස් සහිත කෑම වේල රසවිඳින්නට වුහ. හැමෝම කන්නට පටන්ගත්තත් DMO ලොක්කා කෑම නොකා පිඟාන දෙස ඔරවාගෙන බලාසිටී. අනිත් අය භාවනාකරන DMO දෙස බලාසිටී...මූට මොනවා වෙලාද...කියා මම විමසිලිමත් උනෙමි ලොක්කාට එක උඩ එක පිඟන් දෙකක් ලැබී ඇත...ඇත්තටම පිඟන් දෙකක් තිබෙනවාද ඔරේ ඩෝප් නිසා එක දෙකවී පෙනෙනවාද කියන එක ලොක්කාට ඇති ගැටළුව බව මම වහා තේරුම්ගත්තෙමි. මචං...ඔතන පිඟන් දෙකක් තියෙනවා... එකක් අයින්කරල අනිත්එකේ කන්න පටන්ගනිං...මම මහ හඬින් සියල්ලන්ටම ඇසෙනසේ කිව්වෙමි. සියල්ලෝම මහ හඬින් සිනාසෙන්නට පටන්ගත්හ.
අමාරුවෙන් කොරොල්ලා KE20 මෝටර් රථයේ රියැදුරු අසුනට ලොක්කා ගෙනගොස් දැමුවෙමි. දැන් ලොක්කා ලෑල්ලට පාගලා එනවාය. ලොකු ඇක්සිඩන්ට් එකක් නොවී අපි නිලනිවසට එනවිට රාත්‍රී 2 පමණ විය. උඹ කාර් එක ගැරේජ් එකට දාපං...මං යනව නිදාගන්න කියා...මම කාමරයට වැදී හතරගාතේ දමා නිදාගත්තෙමි. පසුදින උදයේ මම වේලාසනින් අවදිවුනෙමි DMO මචං තවමත් ගොරෝද්දේ අදිමින් නිදිය. ටිකක් හැන්ග්ඕවර් ගතිය තිබූ නිසා ඒක අඩුවෙන්නට මම සිසිල් සුලං විඳිමින් මිදුලේ ඇවිදින්නට පටන්ගත්තෙමි...හුටා ගැරේජ් එක ඇරලා දාලාය...කාර් එක පෙනෙන්නට දනැත...නැගිටපන් නැගිටපන් මම DMO මචං අවදිකිරීමට තැත්කළෙමි...මොන මගුලක්ද යකෝ නිදාගන්නදෙන්නෙ නෑ...හු## ඌ මගේ මෑණියන් අමතනවාය...හු### කාර් එක ගැරේජ් එකේ නෑ හොරු ගෙනිහින්...මොනවා...උගේ ඩෝප් එකවරම හිඳුනේය...ගැරේජ් එකට කඩාගෙන බිඳගෙන දිව්වේය...හුකා...කෝයකෝ යකෝ කාර් එක...මුන්ගේ අම්මගේ අම්මට හු###...ලොක්කා අහුන්ගල්ලේ මව් භාෂාවෙන් ජාතිය අමතනවාය...මළකෙලියකි නර්ස්ලා ඇටෙන්ඩන්ට්ලා ලේබරර්ස්ලා ටිකෙන් ටික වටවෙනාවය...සර් පොළිසියට කෝල් කරල කියන්න...නිමිත්තක් බලමු...හොඳ අංජනම් බලන තැනක් තියෙනවා...ඇඩ්වයිස් හෝගාලා දෙති ලෙඩක් දුකක්වූකල ඉල්ලාංකිකයෝ...අනුන්ට ඇඩ්වයිස් අඩ්වයිස් දෙන්නට රුසියෝය. ක්‍රමයෙන් එළිවිය. කාර් එක ගැන ආරංචියක් නැත. ලොක්කාගේ පලවෙනි කාර් එකම උස්සලාය...පුකේ අත්දෙක බැඳගෙන කල්පනාකරමින් එහාට මෙහාට ඇවිදියි...දැන් මොකේ දැයි දන් වළඳන්නේ...?
ආරියරත්න...ලොක්කගේ පියන් කඩාගෙන බිඳගෙන ආවේය සර් කාර් එක තියෙනවා...කොහෙද යකෝ...ක්වාටස් එක පිටිපස්සේ තියෙන වල්බෙලිගස් කැලෑවඅස්සේ...විත්තිකරු නිහඬවිය. කොරොල්ලා කථාවස්තුව නිමි.

Sunday, 30 September 2018

අම්පාරෙ කතා අංක 1


මගේ ජීවිතයේ රසවත්ම සිදුවීම් සිදුවුනේ අම්පාර රෝහලේ සේවය කල කාලයේය. පාත්‍රවර්ගයා තවමත් ජීවතුන් අතර නිසා හෝ ජීවතුන් අතර නොසිටියත් ඒවා නම්ගම් රහිතව හුදීජනපහන් සංවේගය උදෙසා ලිවීමට අදහස් කලෙමි....
අම්පාරෙ කතා අංක 1
අම්පාර රෝහලට සහකාර වෛද්‍යවරයකුලෙස පළමු පත්වීම ලබා යනවිට මගේ බාහිර පෙනුම පාසල් ශිෂ්‍යයකුගේ මෙන් විය. OPD එකෙන් බෙහෙත්ගන්න පැමිණි ආච්චිලා සමහරවිට දොරකඩින් එබීබලා...ලෙඩක් කියන්නේ කොහොමද ? මගේ මුණුපුරෙක් වගෙයි කියා ආපසු ගිය අවස්ථාද තිබූන බව මම පසුව දැනගතිමි. ඔව්හු මට "කොල්ල මහත්තයා" කියා නමක් පටබැඳ තිබුණි.
"Mama Boy" කෙනෙකුවූ මම මගේ මවට දැඩිසේ ආදරය කලෙමි. ඇයගේ බලවත් විරෝධය හමුවේ සහ මා දැඩිව කම්පනය කල තවත් සිදුවීමක් නිසා...ධර්මාශෝකයේදී වසර 7ක් පමණ පෙම්කල මගේ පාසැල් පෙම්වතියගෙන් වෙන්වීමට මට සිදුවිය. එම වෙන්වීමෙන් ඉතා කෙටි කලක් තුල ඇය ඇගේ මස්සිනා කෙනෙකු සමග විවාහ විය. ඉන්පසු මම කිසිදා විවාහ නොවී සිටීමට තීරණයකර සිටියෙමි. වැදගත් රැකියාවක් කරන බැවින් මට කොක්ක ගැසීමට තරුණියන් කිහිප දෙනෙක්ම උත්සාහ කළහ. සමහර දෙමව්පියෝ මගේ මව වෙත තමන්ගේ දියණිය මගේ කරේ එල්ලීමට විවාහ යෝජනා ගෙනආහ. ඒ කාලයේ මම හැන්ඩි කොල්ලෙකු බවත් නොකියාම බැරිය.
මගේ සත්‍ය ප්‍රේමය කඩාකප්පල් කිරීම ගැන පසුතැවිල්ලෙන් සිටි මව...මාව මනමාලියන් 19ක් බැලීමට බලෙන් ඇදගෙන ගියේය. මගේ කේන්දරේ අඟහරු 7 වර්ගයේ එකක්වූ බැවින් මට කෙල්ලෙක් හොයන එක කේන්දර විශ්වාස කරන මවට පහසුකරුණක් නොවිණි. ඉතිං Vacant Boy කෙනෙකුවූ මම විවාහවීමට අදහස්නොකලත්...කෙල්ලන්ට අන්ඩරදීම සඳහා ලස්සන කෙල්ලන්දෙස උනන්දුවෙන් බලා උන් කුලප්පුකර මාගැන උනන්දුවක් ඇතිකිරීමද කරගෙන ගියෙමි. අම්පාර පැත්තේ කොළණි කෙල්ලන්ගෙන් සමහරුන්ගේ සම්භවය මහනුවර පැත්තේය. මේ කෙල්ලන්ගෙන් සමහරෙක් කැන්ඩියන් නාසයක් සහිත සුරංගනාවියන් මෙන් රූමත් කෙල්ලෝ වූහ.
දවසක් සවස 4ට පමණ මෙවැනි ඉතා රූඋමත් සුදුපාට කෙල්ලෙක් අන්තිම රෝගියා වශයෙන් OPD එකට ප්‍රාධුර්භුතවිය. දවසෙම තනියම ලෙඩුන් 250කටත් වැඩිය බලා හෙම්බත්වී සිටි මගේ දෑස් නීලංකාරවිය. මොකක්ද අමාරුව ? මට ඔළුවේ කැක්කුම හැදෙනවා නිතරම...කොච්චර කල් ඉඳන්ද ? මම ප්‍රශ්ණ විචාරමින් හිස්ට්‍රිය ගනිමින් සිටියෙමි. ඔළුවේ කැක්කුම හැදෙන මේ කෙල්ල ප්‍රශ්නයෙන් ප්‍රශ්නයට උත්තර දෙන්නේ සිනාසෙමිනි. ඔළුවේ කැක්කුම වැඩිකමටද හිනාවෙන්නේ ? ඔව්...කියා ආයෙත් හිනාවෙනවාය. පැනඩෝල් පෙති ටිකක් සහ විටමින් ටිකක් දී ඇය පිටත් කර හැරියෙමි. යන ගමන් පිටුපස හැරී බැලු ඇය යන්නට ගිය අතර මම නිලනිවාසයට ගියෙමි.
මම නැවතී සිටියේ මගේ පාසැල් මිතුරකුවූ DMO ගේ නිල නිවාසයේමය. යාබද අනිත් නිල නිවාසයේ සිටියේ බණ්ඩාය. බණ්ඩාත් මමත්, DMO ත්, එකිනෙකා කලින් හඳුනන, පුද්ගලික සිදුවීම් බෙදාගන්නා හොඳ මිතුරෝ වුනෙමු. දැන්කාලේ PP වලට මිනීමරාගන්නා දොස්තරලා මෙන් නොව අපි තිදෙනාම කලේ එක PP එකකි. සුමානේ අන්තිමට අපි මුදල් සමව බෙදාගත්තෙමු. මුදල් බෙදාගැනීමට ප්‍රථම කැටයකට රුපියල් 20බැගින් දැමීම සිදුකලේ එකවුන්ටන්වූ මාවිසිනි. එම කැටයේ අමධ්‍යප අරමුදල වශයෙන් සඳහන් කරතිබුණි. අපේ නිල නිවසට පැමිණි සියළුම මිතුරෝ අමධ්‍යප අරමුදලට දායක වූහ. සති අන්තයේ එකතුවූ මුදලින් ඩෙවල්බීෆ් කමින්...මත්පැන් බොමින් සිංදු කියමින්...අපි පාටි දැම්මේම්මු. ජීවිතයේ ආතල්ම කාලය මේ අම්පාරේ තනිකඩයන් තුන්දනෙක් වශයෙන් එකට සිටිකාලයයි.
දින දෙකකට පසු...අම්පාර බණ්ඩාරනායක විද්‍යාලයේ OL ශිෂ්‍යාවකවූ...කොළණි සුරංගනාවිය නැවතත් අවසාන රෝගියා වශයෙන් පැමිණියේය. ඇය නැවතත් දකින්නට ලැබීම මට සතුටක් විය. ඇයි තවම ඔළුවේ කැක්කුම හොඳ නැද්ද ? කියා මම ඇසුවෙමි. මට අසනීපයක් නෑ...කියූ ඇය නැවතත් ඇස් පුංචි කරමින් සිනාසෙන්නීය...එහෙනං ඇයි ආවේ ? මං ආවේ ඩොක්ටර් බලලයන්න...සිනාසෙමින් කියූ ඇය පුංචි කවර දෙකක් මේසය මත තබා එලියට දිවගියාය...මම ඒවා විවෘතකර බැලුවෙමි එකක තිබුනේ කලින් දිනයේ ගත් බෙහෙත්ය...අනිත් කවරයේ තිබුනේ ඩෙල්ටා ටොෆි 10යකි.
දොස්තරලා තිදෙනා අතර රහස් තිබුනේ නැත...ක්වාටස් එකට පැමිණි විගසම මම DMO මිත්‍රයාට ඉට්ටෝරිය කිව්වෙමි...ඌ පැන්න ගමන් මගේ අතේ තිබූ බ්‍රවුන් පේපර් කවරය උදුරා ගත්තේය...යකෝ අහුවෙන්න එපා...ඔය කොළණි කාරයෝ හරි භයානක මිනිස්සු. උන් අම්පාරේ එන මිනිස්සු වශී ගුරුකම් කරලා අල්ල ගන්නවා... මේවට මතුරලා ඇති...මෝඩයෙක් වගේ මේවා කන්න එපා...මොනවා හරි ඉනා බෙහෙත් මේවට දාලා ඇති...කියමින් කවරය මේසය උඩින් තැබුවේය. ඔහු දොස්තර කෙනෙකු වුවත් මිත්‍යා විශ්වාස, කතරගම දෙවියන් තදින් අදහන මිනිසුන් සිටින අහුන්ගල්ලේ වැසියෙකි. අදටත් කතරගම වාර්ෂික වන්දනාවේ යන උග්‍ර දේව භක්තිකයෙකි.
මම මේ කෙල්ල ගැන මනෝපාර දාගෙන හාන්සිපුටුවේ කල්පනා කරමින් සිටියෙමි. DMO නාන්න ගිය අතර...අපේ PP එකේ ඩිස්පැන්සර්, මෙන්ඩිසා එතනට කඩා පාත්විය. ඌ DMO අහුන්ගල්ලෙන් ගෙනා, අපේ ක්වාටස් එකේම නැවතී සිටි ලෝක අන්ඩපාලයෙකි. අපේ කෑම උයන...අපට බයිට් හදන කුක් උනෙත් ඌ මය. මම ටික වෙලාවකින් වතුර එකක් බොන්න කුස්සියට ගියෙමි මෙන්ඩිසා මොනවාදෝ බරටම හපමින් එළවලු කපනවාය.... මොනවද යකෝ කන්නේ ? ටොෆි...මොන ටොෆිද ? අර මේසෙ උඩ තිබුණ ටොෆි...උඹ ඒවා ඔක්කොම කෑවද ? ඔව්...මම බක බක ගා හිනාවෙන්නට පටන්ගත්තෙමි...ඇයි සරත් මහත්තයා හිනාවෙන්නේ...පස්සෙ කියන්නං...
DMO නාගෙන ආපසු...වරෙන් යන්න කුස්සියට...මෙන්ඩිසා මරු වැඩක් කරා...මොකක්ද ?. අරූ ඔක්කොම ටොෆි ටික හොරන් කෑවා...හුකා ඌ ඉවරයි...ඉට්ටෝරිය කිව්පසු මෙන්ඩිසා හොඳටම බය විය... බයවෙන්න එපා යකෝ ! කෙල්ල පට්ටම ලස්සනයි !...ඒකි තමයි මම අම්පාරෙදී දැක්ක ලස්සනම කෙල්ල !.

Sunday, 12 August 2018

කැටපෝල් පිස්සුව..




දැන් හැදෙන කොල්ලන්ට වගේ නෙවෙයි... මට පොඩිකාලෙදි සරුංගල් පිස්සුව, රටමාළු පිස්සුව, මෝටර් වලින් බුදුරැස් මාලා කරකවන පිස්සුව, හුමාල බෝට්ටු හදන පිස්සුව, ලී නූල් රෝද වලින් ට්‍රැක්ටර් හදන පිස්සුව, කෝට්ටක ඇණයක් ගහල යකඩ වීල් එකක් පද්දමින් පාරේ යන පිස්සුව, බස් ටිකට් සිගරැට් පෙට්ටි එකතුකරන පිස්සුව, රතින්ඥ කුඩු දාල බෝර හදන පිස්සුව, පරණ කන්නාඩි ලෙන්ස් වලින් ටෙලස්කෝප් හදන පිස්සුව, පිටි ටින්වලින් ගල් රෝල් හදන පිස්සුව, වෙසක් කාඩ් අඳින පිස්සුව, වීදුරු පටි තුනක් ත්‍රිකෝණ හැඩයට කඩදාසියක ඔතල ඒක ඇතුලට මල් පෙති දාල කරකවමින් රටා මැවෙන හැටි බලන පිස්සුව, හෝල් එක ගාවින් ඇහිඳ ගන්න ෆිල්ම් රීල් කෑලි වලට ටෝච් ගහල පිච්චර් පෙන්නන පිස්සුව, සෙල්ලම් තොරන් ගහන පිස්සුව, බට තුවක්කු පිස්සුව වගේ...පිස්සු අටෝරාෂියක් තිබුන. ඒකෙන් උග්‍රම පිස්සුවක් තමයි... කැටපෝල් පිස්සුව.
පේර ගස්වලින් කපාගත්ත කරු තමයි කැටපෝල් හදන්න පාවිච්චි කලේ...ඒවා තමයි නොම්මර එකේ කරු. වින්කල් බාස්ගෙන් අමාරුවෙන් ඉල්ල ගන්න බයිසිකල් ටියුබ් කෑල්ලකින් රබර් පටි කපල...පරණ සපත්තුවකින් හම් කෑල්ලක් කපල අරන් මං හැදුව නොම්මර එකේ කැටපෝල්...මං කැටපෝල් ස්පෙෂලිස්ට් කෙනෙක්. ඉතිං උදේ පාන්දර පහමාරට විතර මං යනව පාන් ගෙන්න...NRB බේකරියට. කලිසමේ එක සාක්කුවක පුංචි බොරළු කැට...අනිත් සාක්කුවේ කැටපෝල්එක... පොල්කිච්චෝ ඉන්නවා ලයිට් කම්බිඋඩ වාඩිවෙලා සිංදු කියමින් හරියටම ඌට යටින් හිටගෙන විදිනවා ඌට. මට ඕනෙ ඌ බිමදාගෙන අල්ල ගන්න විතරයි...මරන්න නෙවෙයි...අල්ල ගන්නෙ ඇතිකරන්න. කලාතුරකින් තමයි දඩයමක් හරිගියේ...අනුන්ගේ වතු වලට තාප්පෙට උඩින් පැනලා...රෑ වැටුනු පැෂන්පෘට් ගෙඩි ඇහිඳීම, ජැම්සන් ගෙඩි කැඩීම පේරගස් සුද්ද කිරීම වගේ දේවලුත් කරා.
ලාල් සහ ආනන්ද තමයි මගේ කැටපෝල් ආමි එකේ අනිත් දඩයක්කාරයෝ දෙන්න. අපි හැමදාම ටින් බෙලෙක්ක තාප්පෙ උඩ තියලා...ඒවට විදලා ටාගට් ප්‍රැක්ටිස් කලා. ලාල්ට තමයි වැඩිපුරම දඩයම් ලැබුනේ. අපි නිතර දඩයම් සඳහා රැකගෙන හිටියෙ අම්බලංගොඩ...පරණ පාරේ ගම්සභා උසාවියේ විශාල ජෑම් ගහ උඩ තමයි... ජෑම්ගෙඩි කන්න බට්ටිච්චෝ, ජම්බු කොට්ටෝරුවෝ කොබෙයියෝ හුඟක් ආව. ලාල් ගෙන් ෂොට් එක කාපු හුඟක් කුරුල්ලෝ මැරුණ. ලාල් දවසක් එහෙම මැරුණ බට්ටිච්චේකුගේ බඩ බ්ලේඩ් එකකින් පලල ලේ අරගෙන උගේ කැටපෝල් එකෙයි මගේ කැටපෝල් එකෙයි හම්කෑලිවල ගෑව...එතකොට ෂොට්එක හරියටම වදිනව කියල ලාල් කිව්ව. කුරුල්ලෙකුට වගේ පියාඹන්න බැරිඑක ගැනත් මට හරි කණගාටුවක් තිබුන. අපි දේවානන්ද විද්‍යාලයේ පංති කාමර වල සිවිලිමටත් හොරෙන් රිංගුවා පරෙයි පැටව් අල්ලන්න. දවසක් ලාලුයි මමයි පිට්ටනියේ තියෙන බෝගහට නැග්ගා ගීරාබෙනවල පැටව් ඉන්නවද බලන්න. එතනට ආපු ගෑණියෙක් මොර දෙන්න ගත්තා...බැහැපියව්...බැහැපියව්...හපෝයි මෙහෙමත් පව්කාරයෝ...! අපි ඉක්මනට බෝගහෙන් බැහැල පැනල දිව්ව... ඉතිං මගේ කැටපෝල් පිස්සුව හොඳ උනේ AL කරන්න පටන් ගත්තට පස්සෙ තමයි...දැන් කාලේ නම් කැටපෝල් එකක් අතේ තියෙන කොල්ලෙක් දකින්නවත් නෑ...
ඉතිං මට වගේම කැටපෝල් පිස්සුව තදින්ම තිබුණු කොල්ලෙක් හිටියලු...ඉතිං ඌට අවරුදු 20ක් වෙලත් දවසෙම වැඩේ කැටපෝල් එකත් අරගෙන කුරුල්ලෝ දඩයමේ යන එක. පස්සේ අම්මයි තාත්තයි තීරණය කලා මේක මානසික රෝගයක් කියල. ඌව බලෙන්ම ඇදගෙන ගියා මනෝ වෛද්‍යවරයෙක් ලඟට. මනෝ වෛද්‍යවරයා කල්පනා කළා මේ කොල්ලගේ අවධානය වෙන අතකට යොමු කරලා. මේ කැටපෝල් පිස්සුව හොඳ කරන්න...
දැන් පුතා වැඩියෙන්ම ආස මොනවටද ?
මං වැඩියෙන්ම ආස කැටපෝල් එකෙන් කුරුල්ලන්ට විදින්න...
දැන් ඔයා කැලේ කුරුල්ලන්ට විදින්න යනකොට ලස්සන කෙල්ලෙක් හම්බ වෙනවා එතකොට ඔයා මොනවද කරන්නේ ?
මං එයා අල්ලාගෙන එයාගෙ ගවුම ගලවනවා...
හරියටම හරි....එයිට පස්සේ ?
මං එයාගෙ යට සායත් ගලවනවා ?
නියමයි !...එයිට පස්සේ ?
මං එයාගෙ නිකර් එකත් ගලවනවා...
අන්න එහෙම තමයි නියම කොල්ලෝ...
එයිට පස්සේ ?
ආ...ඊළඟට මං එයාගෙ නිකර්එකේ....ඉලාස්ටික් පටිය අරං කැටපෝල්එකක් හදනවා !!!.

Friday, 29 June 2018

JVP දේශප්‍රේමීන් (6)....ජපානයේ ජීවිතය...

JVP දේශප්‍රේමීන් (6)....ජපානයේ ජීවිතය...
මගේ බොක්කේ මිත්‍රයා...සරත් පැටිකිරිකෝරාළ ජපානයේ, ජර්මනියේ සහ මලාවි නමැති අප්‍රිකානු රටේ වසර ගණනාවක් මෝටර් කාර්මිකයෙකු ලෙස සේවය කර තිබුණි. ඔහුට ජපන් භාෂාව කතා කිරීමේ හැකියාවද තිබුණි. මේ නිසා ඔහු සමග ජපානයට යෑමට මට කිසිදු චකිතයක් නොවුනි. අප නවතින්නට යන්නේ අදාචිසාං නමැති ඔහුගේ ජපන් මිතුරාගේ ගෙදරය. අදාචිසාං මට ලංකාවේදී මුණගැසී ඇත. ඔහු නිවාඩුවට ලංකාවට ඇවිත් මමත් සරතුත් සමග නුවරඑළි ගියේ මගේ මෝටර් රථයෙනි. සිගරැට් පැකට් ගණන් බොන ඔහු, නිතර සිනාසෙන විනෝදකාමී චරිතයකි. නුවරඑළි යද්දී අපි බණ්ඩාරවෙල නගරයේ ඇවිදිමින් සිටියෙමු. අදාචිට කමීසයක් මිලයට ගන්නට ඕනෑ බව කිව්නිසා අපි රෙදි කඩයකට ගියෙමු එහිදී පෝලෝ නමැති කමීස වර්ගය ලාබෙට තිබෙනවා දැක අදාචිසාං සතුටින් පිණාගියේය. වහාම එයින් කමීස දහයක් දෙන ලෙස ඔහු වෙළෙන්දා ගෙන් ඉල්ලාසිටියේය. මෙච්චර කමීස මොකටදැයි ඇසූ විට මිතුරන්ට තෑගී දීමට බව ඔහු කීවේය. අදාචිසාං...පෝලෝ ෂර්ට් වෙරිගුත්තෝ... කියා මම ඇසුවෙමි ? ෂර්ට් එකක් අහසට අල්ලා එහි ඇති ගැටගැසුණු නූල් පෙන්වූ ඔහු...ෂර්ට් නෝ ගුත්තෝ...නේම් වෙරි ගුත්තෝ කියා කිව්වේය. ඔරිජිනල් පෝලෝ ෂර්ට් ජපානයේ මිල අධිකය.
අදාචිසාං වෘත්තියෙන් විදුලි කාර්මිකයෙකි. දහවල් විවිධ කර්මාන්තශාලා වලට යමින් ඒවායේ ත්‍රී ෆේස් මෝටර් සවිකිරීම, ඩිස්ට්‍රිබියුෂන් බොක්ස්, ලොකු මේන්ස්විච් සවිකිරීම වැනි බරසාර වයරින් වැඩ කර දිනපතා ගානක් සොයාගැනීම ඔහුගේ ජීවිකාව විය. දවසේම මහන්සිවී වැඩකරන ඔහු රාත්‍රියට නිදා ගන්නේද කුකුල් නින්දකි. මහරෑ එක් වරම අවදිවී රූපවාහිනිය නැරඹීම ඔහුගේ සිරිතවිය. මේ නිසා අපගේ නින්දටද බාධා ඇතිවිය. ටිකදිනෙකින් අපිද එසේ කරන්නට පුරුදු උනෙමු. උදේ පාන්දරම නැගිට ප්‍රාදේශීය පත්තර කිහිපයක ඇති ලුහුඬු දැන්වීම් ඉතා සැලකිල්ලෙන් බලන ඔහු එම දවසට කළහැකි ජොබ් එකක් සොයාගනියි. ඒවා පෑනෙන් සලකුණු කරගෙන දුරකථනයෙන් කර්මාන්තකරු අමතා... ගණන්හිලව් කතාකර ගනියි. සරත් සහ මම බොහෝ දිනවල ඔහුට සහාය වීමට ඔහු සමග කර්මාන්තශාලා වලට ගියෙමු. එහිදී හමුවන මිනිසුන්ට ඉංග්‍රීසි භාෂාවෙන් කතාකළ විගස මගහැර යෑම ජපනුන්ගේ සිරිතවිය. ඉංග්‍රීසි භාෂාව කතාකරන මිනිසුන් ජපානයේ විරලය. ජපානයේදී වැඩට සහාය වීමට කිසිවකු සොයාගැනීම ඉතා අපහසුවූ බැවින් අප ඔහුගේ නිවසේ නැවතී සිටිනවාට අදාචිසාං බොහෝ කැමතිවිය. ඔවුන් විවිධ වර්ගයේ කෑම අප සඳහා රෙස්ටුරන්ට් වලින් රැගෙන ආ නමුත්...අලංකාර ලෙස සරසා අමුවෙන් තිබූ ඒකෑම කන්නට මටනම් නොහැකිවිය. මං ආසා කල දේවල් වුනේ පුළුස්සන ලද හරක්මස්, බැදපු බිත්තර සහ මාළු පමණකි ඒවා සමග ලැබුනේ බෙරිඋන සුදුහාලේ බතකි. ටෝෆු නමැති සෝයා කිරිවලින් සාදන ලද මළජරාවක්ද මේ කෑම වර්ග සමග නිතර ලැබුණි. අදාචිසාං සහ බිරිඳ මම හරිහැටි කෑම නොකනබව දැක විස්සෝපවූහ.
අදාචිසාංට දරුවන් තිදෙනෙකි. තුන්දෙනාම කොල්ලෝය බාල කොලුවාගේ නම “හිදෙතෝ”ය. හිදෙතෝ වහාම මාසමග මිතුරුවිය. මේ කොල්ලෝ තිදෙනාම ඉගෙනීමට කිසිම උනන්දුවක් නොදැක්වූ අය වූහ. ලොකු එකා උදෙන්ම බයිසිකලයේ නැග මිතුරන් සමග අතුරුදහන් වෙන අතර ගෙදර එන්නේ දවසක් දෙකක් ගතවුණු පසුවය. කොහේ යනවාදැයි කිසිවකු නොඅසති. ඔහු පසුකලෙක ඇතිවූ වීදි සටනකදී සතුරකු එල්ලකල පා පහරකින් අක්මාව පුපුරා මියගිය බව දැනගන්නට ලැබුණි. බාල කොළුවා ගෙදර ඉන්නාවිට කලේ VHS කැසට් කුලියට දෙන කඩවලින් චිත්‍රපටි ගෙනැවිත් ඒවා නැරඹීමය. දවසක් හිදේ කැසට් ගැනීමට මාසමග කැසට් කඩයට ගියේය. හිතහොඳඑකෙක්වූ ඌ නොම්මර එකේ අන්ඩපාලයෙකි. මාවත් ඇදගෙන කැසට් කඩයේ කෙළවරකට ගිය හිදේ...සරත්තෝසාං.. සෙක්ස් වීඩියෝ අරු...කියා මට අසභ්‍ය වීඩියෝ කැසට් තිබෙන බව පෙන්වීය. එවකට වයස හතක්වූ මූ ෂුවර් එකටම මේවා බලනවා විය යුතුය. මිනිස් නිදහස උපරිමයෙන් ඇති ජපානයේ මේවා තහනම් නැත. 

මතු සම්බන්ධයි...

Thursday, 14 June 2018

රූකඩ අම්බලන්ගොඩ...


මා කුඩා කල අපේ ගේ ඉදිරිපිට කඳු ගැටයක් මත ඉතා අලංකාර මන්දිරයක් විය. එහි උද්‍යානයේ ඉතා අලංකාර මල් වර්ග වවා තිබුණි. එහි ගෘහ අධිපතියා වූයේ නඩුකාර හාමුදුරු කෙනෙකි. මේ ප්‍රතාපවත් මිනිසා විනිසුරු T C P ප්‍රනාන්දු නම් විය. ඔහුට ඒශන්, ලලීන් යනුවෙන් පුතුන් දෙදෙනෙක්ද චාමිණී නම් දියණියක්ද විය. පුතුන් දෙදෙනාම පසුකලෙක හමුදා නිලධාරීන් වූහ. ඔහුගේ බිරිඳ වූයේ චම්ලි ගුණවර්ධනනම් වාමාංශික දේශපාලඥගේ නැගණියයි. ඇය සුද්දියෙක් මෙන් සුදු රූමත් අහංකාර ස්ත්‍රියක් විය. අප ඇය හාමු වශයෙන්හැඳින්වීමු. කිසිවකුට අනවසරයෙන් එම වත්තට ඇතුළු වීමට ඇය ඉඩ නොදුන්නේය. මගේ පියා ඔවුන්ගේ දරුවන්ට සිංහල ඉගැන්වීමට ගිය නිසා මට එම මන්දිරය දැකබලා ගැනීමට ලැබුණි. මේ නඩුකාර තුමා පසුකලෙක අම්බලංගොඩ නගරාධිපති ලෙසද පත්විය. ඉංග්‍රීසියෙන් කතාකරන මේ තද ගතිගුණ ඇති මිනිසා පුදුමයකට මෙන් විශ්ෂ්ඨ කලා රසිකයකු විය. ඔහු ඇළුම් කලේ රූකඩ කලාවටයි. ඔහු එයට කොතරම් ආශක්තවීදයත් තමන්ගේ වත්තේ කෙලෙවරේ රූකඩ නාට්‍ය පෙන්වීමට කුඩා නිවසක් සෑදවීය. එහි පසුපස කොටසේ කදුරුලී වලින් රූකඩ නිෂ්පාදනයකිරීම, ඒවා නැටවීම පුහුණු කිරීමට ගුරුන්නාන්සේලා නේවාසිකව සිටියහ. ඔවුන් තබ්ලා, සර්පිනා වාදනය කරමින් රූකඩ නටවන්නට පුහුණුවන අන්දම බලාසිටීමට අපි හාමුගේ වත්තට හොරෙන් රිංගුවෙමු. ඉඳහිට...හාමුගේ වත්තේ ඇති විශාල පේරගස්වලට සුද්දය දීමටද අමතක නොකළෙමු.
කොළඹ සිටින තමන්ගේ හිත මිතුරන්ට, නෑයින්ට, ප්‍රභූවරුන්ට රූකඩ සංදර්ශන පැවැත්වීමෙන් නඩුකාර උන්නාන්සේ මහත් විනෝදයක් ලැබීය. එම දිනවලදී Brooklyn යනුවෙන් නම් සඳහන්කර ඇති මන්දිරයේ විශාල යකඩ ගේට්ටුව දෙපසට ඇරදමා තිබුණි. මේ ගම්වැසියන්ට රූකඩ නාට්‍ය නොමිලේ නැරඹීම සඳහා ඔහු නිහඬව ආරාධනා කල අයුරුයි. ආරාධිතයෝ ඉදිරිපෙළ අසුන්වල සිට රූකඩ සංදර්ශනය රසවින්ද අතර අපි පසුපෙලට වී හිටගෙන රූකඩ කතන්දර නැරඹුවෙමු. විදුර ජාතකය, සිරිසඟබෝ ජාතකය, කෝනංගි නැටුම, මරඟණන් පැරදවීම, චිංචි මානවිකාවගේ කතාව, පොලිස් කෝලම ආදිය මට මතක ඇති කතන්දරයි. මුලින්ම රූකඩ කලාව අම්බලන්ගොඩට හඳුන්වා දුන්නේ පොඩිසිරිනා ගුරුන්නාන්සේය. ඔහු බ්‍රිතාන්‍ය රාජකීයයන්ගෙන් සම්මාණලද කලාකරුවෙකි. පසුව ඔහුගේ පරපුරේ අය රූකඩකලාව ඉදිරියට පවත්වාගෙන ගියහ. වරෙක නඩුකාර උන්නාන්සේ ජානා හව්ලිකෝවා නමැති රුසියානු Glow Puppet නැටවීමට දක්ෂ ශිල්පිණියක් ගෙන්වා සංදර්ශනයක් පැවැත්වීය. ඒ දිනවල විරාජමානව වැජඹුනු නඩුකාර මන්දිරය දැන් දියසෙවෙල්කා ගරාවැටී ඇති අන්දම දක්නට ලැබීම ශෝකජනකය.
මෙම රූකඩ කලාව දැන් අභාවයට යමින් ඇත. රූකඩ කියූවිට අම්බලංගොඩ නගරය මතක්වන එක ළඟදීම නැතිවනු ඇත. දැන් නඩුකාර මන්දිරය දියසෙවෙල්කා ගරාවැටී ඇත. එහි දැන් කිසිවකු ජීවත්වනවාදැයි මා දන්නේනැත. පැරණි රූකඩ සහ වෙස්මුහුණු වලින් බොහොමයක් පටබැඳිමුල්ලේ අපේ නිවස අසල ඇති ආරියපාල ගුරුන්නාන්සේගේ වෙස්මුහුණු කෞතුකාගාරයයේ ප්‍රදර්ශණයට තබා ඇත. රූකඩ නටවන්නේ කතිරයක ආකාරයට අල්ලාගත් ලීකැබලි දෙකකට නූල් සවිකර ඒවා රූකඩයේ අත් පා වලට ගැටගසා උඩට පහතට ඇදීමෙනි. මෙයට ඉතා අසීරු පුහුණුවක් අවශ්‍යවිය. වරක් ඈත පළාතකදී පැවැත්වූ රූකඩ සංදර්ශනයකදී පොඩි අඩියක් ගසා සිටි ගුරුන්නාන්සේට බුදුහාබුදුරුවන්ගේ සහ මරඟනගේ රූකඩ මාරුවිය, මරඟන සමාධිගතව වැඩසිටින අතරේ බුදුහාමුදුරුවෝ සිව්ර කරට ගෙන ඔසවමින්...සිරා ඩාන්ස් එකක් දමන්නටවීම නිසා...හූ නාදය දසඅතේ පැතිරී තිබුණි !

.

Sunday, 10 June 2018

මහින්ද දේශප්‍රිය, සරත් විමලසුරිය සහ MD විමලසූරිය...


අවසාන කොටස...
මට පාසැල් කාලයේ ශිෂ්‍ය මනස තේරුම්ගතහැකි විශිෂ්ඨ ඝනයේ ගුරුවරු හමුවූයේ අල්පයකි. අපේ ප්‍රින්සිපල් MD විමලසූරිය මහතා ඉන් විශිෂ්ඨතමයාය. ඔහු හැර වෙනත් අයකු අපේ ප්‍රින්සිපල් වුනානම් මහින්ද දේශප්‍රිය යන මැතිවරණ කොමසාරිස් වරයා හෝ සරත් විමලසුරිය යන නවනිපැයුම් කරුවා මෙලොව හැර ගොස් බොහෝ කල්ය. 71 කැරැල්ලට කෙලින්ම හෝ අනියමින් දායකවූ කිසිම පාසැල් ශිෂ්‍යයකු පාවා නොදීමට ඔහු තීරණය කළේය. මේ ළදරු වලිප්පු විප්ලවයට සම්බන්ධ සියළුම පාසැල් දරුවන්ගේ ලිස්ට් එක ඔහුගේ ලාච්චුවේ තිබුණ බවට සහතිකය. පොලීසියෙන්, ආමි එකෙන් උසස් නිලධාරීන් ඔෆීස් එකටම ඇවිත් ඉල්ලුවත් ළමයින් පාවා නොදීමට තරම් ඔහු ප්‍රතාපවත් අදීන මිනිසෙකු විය. 71 ප්‍රහාරයට කෙලින්ම සම්බන්ධවූ කිසිම ශිෂ්‍යයකුගේ නම් ඔහු හෙළි නොකළ අතර ඉන් බහුතරය අදත් ජීවතුන් අතර සිටිති. පාසලේදී පොලිස් අත්අඩංගුවට ගත් එකම ශිෂ්‍යයා බැලීමට පොලීසියට පයින්ම ගිය පප්පාසර් පහරදීමට ඉඩනොදී, ඔහුගේ ජීවිත ආරක්ෂාව සහතික කළේය. ඔහු ගණිතයට විශේෂ ඇල්මක් දැක්වීය. උසස්පෙළට දරුවන් තේරීමේදී ඔහු යොදාගත් සාධකය ගණිතය විය. ගණිතයට 60ට වැඩියගත් මහින්ද මැත්ස් කිරීමට තෝරාගත් අතර 52ක් ගත් මා බයෝ ක්ලාස් එකට දැම්මේය. උසස් පෙළ ඉහලින්ම සමත්වූ මහින්ද දේශප්‍රිය ඉංජිනේරු අංශයට උඩින්ම තේරුන නමුත් පප්පාසර් කිව්වේ අපිට ඉංජිනේරුවෝ ඇතිතරම් ඉන්නවා අපිට, අවශ්‍ය විද්‍යාඥයෝ තමුසේ යනවා කෙමෙස්ට්‍රි ස්පෙෂල් කරන්න. මහින්ද ඒ අනුව පේරාදෙණි ගොස්
ඩිග්‍රිය ගසා...පසුව CAS කර නියෝජ්‍ය මැතිවරණ කොමසාරිස් කෙනෙකු විය . එයට ඔහුගේ ඇඟේම තිබුණ දේශපාලණය බලපෑවයි සිතමි. නමුත් ඔහු තම මතය අනුව නොව පවත්නා නීතිය අනුව කටයුතු කරමින් රාජකාරි ඉටුකරයි. මට මගේ ඉල්ලීමට ගණිත අංශයට යන්නට ඉඩ දුන්නානම් පාරේ තාරදාන අන්දම බලාසිටිමින් කොල අත්සන් කරන පොතේගුරු ඉංජිනේරුවකු බවට මා පත්වනු නිසැකය. රෝයි සර්, සමන්මලී මිස්, මහින්දරත්න සර් මා ප්‍රියකළ ගුරුවරුන් තිදෙනා විය.
දැනුත් ඉඳහිට අම්බලන්ගොඩ ගියවිට පාසැලට ගොස් මං ඉගෙනගත් උඩ තට්ටුවේ පංති කාමරයෙන් පහල බලා සිටිමි. මම දැන් දම්සෝවට ආගන්තුකයෙකි...මා දන්නා හඳුනන කිසිවකුත් දැන් මෙහි නැත...මා ප්‍රිය මිතුරු මිතුරියනි...නුඹලා කොහි සැඟවිණි ද ?... මට අතීතය මතක්වී...පපුවේ හිරවුණු මහා දුකක්...පාළුවක් දැනෙන්නේ ඇයිදැයි නොදනිමි.
#නිමයි.

මහින්ද දේශප්‍රිය සහ සරත් විමලසුරිය 3...


මුළු දිවයින පුරාම එකම විදියේ පෝස්ටර් එක රැයක් තුල ඇලවෙන්නට විය. 
UNP එක පරදා සිරිමාගේ ආණ්ඩුව ගේන්නට උදව්කල තරුණයෝ සහ වාමාංශික අදහස් වලට වශීවූ මං වැනි හුජ්ජ කොල්ලෝ බුරුතු පිටින් තම දේශපාලණ ව්‍යාපාරයට නතුකරගන්නට හෝ පූර්ණ කාලීන සාමාජිකයින් කරගන්නට විජේවීරගේ කතා ඉවහල් විය. සිරිමාගේ අර්ධ කොමියුනිස්ට් පාලණය නිසා රටේ මහා සාගතයක් ඇතිවී තිබුණි. සිරිමා හැම් බේකන් කමින් අපට මයියොක්කා සහ ඉන්නල ගිල්ලෙව්වේය. ඇගේ දරුවෝ විදේශ අධ්‍යාපනය ලද අතර අපට කොපිපොත් හිඟයක්ද තිබුණි අපට පුතේ මගක් නැතේ නම් නාට්‍යයක් ඒ දිනවල දිවයින පුරා රඟ දැක්විණි. ගාල්ලේ ඉස්ටේසමේ බිත්තියේ රතුපාට පොල්ගෙඩි අකුරින් මෙසේ ලියා තිබුණි. "#අපට පුතේ මගක් නැතේ...කන්න නැතුව ගූත් නැතේ " !. දිගින් දිගටම තැන තැන බෝම්බ පිපිරීම් සහ වතුවල තිබූ තුවක්කු පැහැර ගැනීම් වාර්තාවිය. කෑගල්ල නෙළුම් දෙනියේ තැනෙක විශාල බෝම්බ පිපිරීමක් සිදුවී එක් අයෙක් මරණයට පත්වූ බව මතකය. මොකක් හෝ ගේමක් යටින් යන බව දැනසිටියත් හොඳ බුද්ධි අංශයක් හෝ දියුණු සන්නිවේදන ක්‍රම නොතිබූ ඒ කාලයේ යටින් යන භයානක ගේම් එකේ තරම ගැන... සිරිමාගේ කුජීත ආණ්ඩුවට හෝ ඇගේ වන්දි භට්ටයාවූ ෆීලික්ස් ඩයස්ට හරි වැටහීමක් නොතිබුණි. ඒත් කොල්ලන්වූ අපි ළඟදීම රටේ විශාල ලේ වැගිරීමක් සහිත විප්ලවයක්වන බව හොඳින්ම දැනසිටියෙමු. මගේ මාමා පොලීසියේ රේඩියෝ ඔපරේටර් වරයා විය. අලුත්ම ආරංචි අපට ලැබෙන්නේ ඔහු මගිනි. පොලීසි අතර සන්නිවේදනය කෙරුනේ 4Mhz ඔස්සේ කෙටිතරංග SSB (single side band ) රේඩියෝ ට්‍රාන්ස්මීටර් මගිනි. මෙය වැඩිපුරම කෙරුනේ මෝස් සංඥා ක්‍රමයටය. අද හවස වැල්ලවාය පොලීසියට ගහලා ආයුධ පැහැරගෙන මාමා පලමු කණකොක් ආරංචිය ගෙනාවේය. අද රෑට ලංකාවේ හැම පොලීසියකටම ගහන්නලු ඉන්නේ අපි ලැස්තිපිටයි ඉන්නේ. සේරම පොලිසි ඇලර්ට් එකේ ඉන්නේ මාමා කිව්වේය. අද රෑට නියම ගේමක් යන බව මට සහතිකය. වැඩේ භයානක ලෙස වැරදී තිබුණි ගුරුවරු ලෑස්තියි පහට එන්න කියන පණිවිඩය රැගත් ටෙලිග්රෑ්මය වැල්ලවායේ JVP ලොක්කාට වැරදීමකින් 4 වෙනිදා ලැබී තිබුණි. ඔව්හු වැල්ලවාය පොලීසියට අප්‍රේල් 4 වෙනිදා හවස පහර දුන්හ. මෙසේ සිදු නොවුනානම් ලංකාවේ ඉතිහාසය මදක් වෙනස් වන්නට ඉඩ තිබුණි. අම්බලංගොඩ පොලීසියේ පොලිස්කාරයෝ පෙට්ටගම හැර ඉතා බර තිතටම වෙඩි තැබියහැකි .303 රයිෆල් මානා ගෙන සතුරා පිළිගැනීමට පොලීසියේ උඩ තට්ටුවේ සැදී පැහැදී සිටියහ. ආණ්ඩුව වැඩේ සීරියස් ගණන් ගත්තේ නැතිනිසා හමුදා කැඳවීමක් සිදු නොවුනි. මේ මොකුත් නොදත් චේගුවේරා කාරයෝ ලෑස්ති පිට සිටි පොලිසි වලට සර්ප්‍රයිස් අටෑක් දීමට ගොස් ඉල්ලං කෑහ. අම්බලන්ගොඩ පොලීසියට ගහන්නට ඇවිත් තිබුනේ ෂොට්ගන් සහ කිරිටින් බෝම්බ ට්‍රැක්ටරයක පටවාගෙනය. උදේ මේ ප්‍රහාරය බලන්නට මම රන්දොඹේ පිහිටි අම්බලන්ගොඩ පොලීසියට ගියෙමි. රාත්‍රියේ ඇතිවූ වැස්සට තෙමුණු, මේ රතිඤ්ඤ සේවා නූලක් සහිත ඉතා ප්‍රාථමික කිරිටින් බෝම්බ කිසිවක් පුපුරා ගොස් තිබුනේ නැත ඒවා පොලීසියේ මිදුලේ තැන තැන වැටී තිබුණු අතර. අරලිය අතුවලින් වැසූ කොල්ලන් තිදෙනකුගේ මළසිරුරු පොලීසියේ මිදුලේ වැටී තිබුණි. මට ඔවුන් ගැන මහා දුකක් ඇතිවිය. හොර වේසිගේ පුතාලා රෑට බෝම්බ ගහලා දැන් එනවා බලන්න කියා පොලිස්කාරයෝ අපිට පුකට පයින්ගසා පන්නා ගත්හ.
#මතු සම්බන්ධයි #

Saturday, 9 June 2018

මහින්ද දේශප්‍රිය සහ සරත් විමලසුරිය 2...


මහින්ද දේශප්‍රිය සහ සරත් විමලසුරිය 2...
පෝස්ටර් ඇලවීමට අවශ්‍ය පාප්ප සාදාගැනීමට පාන්පිටි බාගයක් හවස ගෙනැත් ඇඳයට තැබුවෙමි. සරුංගල් සෑදීමට පාප්ප සෑදීමෙන් පාප්ප විශේෂඥයෙකුවූ මම පාප්ප නරක්වී ගඳගැසීම වැලක්වීමට පල්ලමානික්කම් ටිකක් එකතුකර තැබුවෙමි. අපි දෙදෙනාම පදිංචිව සිටියේ පාසැල අසලමය වෙනදා පරක්කුවී පැමිණෙන මම උදෙන්ම පාසැලට රිංගුවෙවෙමි. මහින්ද ඒ වනවිතත් පඩිපෙළට මුවාවී පෝස්ටර් මිටියත් සමග සිටියේය. තවත් මිතුරකු ඒ සමග සිටියත් ඔහුගේ නම හෙළිකිරීමට මට අවසර නැත. අපේ කරුමෙට පාසැල තම ජීවිතය කරගත් ගුණසිරි පියන්, අපි දෙන්නා පඩිපෙළ අසල උදෙන්ම ගැවසෙනු දුටුවේය. පෝස්ටර් අලවන එක ඔහු දුටුවේ නැති බව සහතික නිසා අපි උඩතට්ටුව පුරාම සිත්සේ පෝස්ටර් ඇලෙව්වෙමු මම පාප්ප ගෑ පෝස්ටර් උස මහින්දයා ක්ෂණිකව ඇලෙව්වේය.
"#දනින් වැටී ජීවත් වෙනු වෙනුවට
හුරුවව් දෙපයින්සිට මිය යන්නට "
"#ගංවතුර, නාය යෑම්, සූරාකෑම වැලක්විය
හැක්කේ විප්ලවයට පමණකි#
#සොයුරු සොයුරියනි ළඟ එන විප්ලවයට සූදානම්
වන්න#
මේ සමහර පෝස්ටර් වල තිබු, ඇඟේ මයිල් ඉස්මයිල් වන උද්ධෘතපාඨ විය. මහින්ද සිටියේ මැත්ස් ක්ලාස් එකේවූ අතර මම හිටියේ බයෝ ක්ලාස් එකකය. කව්ද මචං රෑට මේව ගහන්නේ කසුකුසුව සෑම තැනම පැතිරුණි. ගුරුවරුද මේවා කියවමින් බියපත් මුහුණින් ගමන් කරන අන්දම හොරපූසා... ජනේලයෙන් මහත් අභිරුචියෙන් බලාසිටියේය. කව්රුවත් මේවා ගලවන්නට ආවේ නැත. අපේ ආතල් එක වැඩි වෙලාවක් තිබුනේ නැත. ධර්මශෝකේ අඩි හයක් උස සුදු ටයි කෝට් හැඳි ප්‍රතාපවත් රජ්ජුරුවෝ... එම් ඩී විමලසූරිය (පප්පා සර්) තඩි වේවැලත් සමග උඩතට්ටුවට ගුණසිරියා සමග ප්රාධූර්භුත විය. බෝම්බය පත්තු වෙයිද ?ඩිග්...ඩිග්.. ඩිග්...මගේ පිටකොන්ද දිගේ සීතලක් ගලාගෙන ගියේය...ගලවපං මේවා...ගුනසිරියා උඩ පැන පැන පෝස්ටර් ගැලෙව්වේය. ඔක්කොම පෝස්ටර් අත්අඩංගුවට ගන්නා ලදී...මහින්දයෝ.. යෝ...අපටත් බඩු පැකට් වෙන්නයි යන්නේ...මගේ යටිසිත කෙඳිරුවේය. සරත් විමලසූරියට ප්‍රින්සිපල් මහත්තයා එන්න කිව්වා ඔෆීස් එකට. මං යනකොට මහින්ද දේශප්‍රියත් ඔෆීස් එකේය. බුද්ධි අංශ ලොක්කා තඩි වේවැලකින් වම් අල්ලට තට්ටු කරමින් සිටී. උඹලා දෙන්න නේද පෝස්ටර් ගැහුවේ...වහලේ උළුකැට දෙකතුනක් ගැලවී අභ්‍යවකාශට වීසිවිය...ගුනසිරියා ඇහින්දැක්ක ගානට ඔත්තුව දීලාය. වෙන වෙනමත් ඒකටත් තබා ප්‍රශ්ණ මාලාව බුද්ධි අංශ ලොක්කා විසින් ඉදිරිපත් කරන ලදී. පෝස්ටර් ගැහුවේ අපි බව සුචච කීකරු හොඳලමයින් දෙන්නකුවූ අපි වහාම පිළිගත්තෙමු...හෙට එන්න කියනවා තාත්තට. හරි දැන් පලයල්ලා පන්තිවලට. ලෝක පුදුමයකි එක පහරක් හෝ ගැහුවේ නැත !
තාත්තා රෑ ගෙදර එනවිට නිව්ස් එක ලැබිලාය. ඔන්න මූ JVP එකට බැඳිලා පෝස්ටර් ගහලත් අහුවෙලා. උඹ කොහොමද පරයෝ. පියසේනගේ කොල්ලත් එක්ක එකතුඋනේ. උන් සමසමාජ කාරයෝ. හොඳ ගුටි පූජාාවක් මට ලැබුණි. තාත්තා මට එලව එලවා ගැහුවේය. අම්මා හොටු හූරමින් අඬයි. මුළු ගෙදරම මළගෙයක් විය. පසුදින තාත්තා ප්‍රින්සිපල් හමුවීමට ගිය අතර පාසැල්යෑම මට තහනම් කරන ලදී. සතියකින් සියල්ල නියුට්‍රල් විය. කිසිම දඬුවමක් පප්පාසර් ගෙන් නොලැබුණි.
#තරුණවියේදී ඔබ කොමියුනිස්ට් විප්ලවවාදියෙක් නොවූයේ නම් ඔබට හදවතක් නැත...
#මහළුවියේදීත් ඔබ කොමියුනිස්ට්වි ප්ලවවාදියෙක් වූයේ නම් ඔබට මොළයක් නැත ! #
#මතුසම්බන්ධයි#

මහින්ද දේශප්‍රිය සහ සරත් විමලසූරිය


මහින්ද දේශප්‍රිය සහ සරත් විමලසුරිය...අපි දෙදෙනාම අම්බලන්ගොඩ ධර්මාශෝකයේ ආදි ශිෂ්‍යයෝ වීමු. මහින්ද පාසැල් කාලේ ප්‍රසිද්ධව සිටියේ සහ ඉගෙනීමට අතිදක්ෂ හොඳ කථිකයකු ලෙසටය. මම ප්‍රසිද්ධව සිටියේ කාර්මික කටයුතු වලට දක්ෂ, පුංචි දේටත් ලොකු වලි ඇදගන්නා ගුරුවරුන්ටත් බය නැති නිතර විනය පාලක ගින්නාගේ ප්‍රහාර වලට ලක්වන මැරයෙකු ලෙසටට. වරක් මහින්දත් මමත් පිට්ටනියේ ක්‍රිකට් මැච් එකක් දවසක වලියකට පැටලුණි. මටවඩා වසර කිහිපයකින් වැඩිමහළු සුනන්ද දේශප්‍රිය වහා පැමිණ මට පහරදී සහෝදරයා බේරා ගත්තේය.මගේ පියා ගුණපාල විමලසූරිය අතිදක්ෂ සිංහල සාහිත්‍ය ගුරුවරයකු විය. මගේ මවද පුහුණු ගුරුවරියකි. මගේ තාත්තා පට්ට UNP කාරයකු වූ අතර මහින්දගේ පියා පියසේන මහත්තයා කොමියුනිස්ට් අදහස් ඇති සමසමාජ කාරයකු විය. ඔහුගේ මවද ගුරුවරියකි. මගේ තාත්තා සහ මහින්දගේ තාත්තා දේශපාලණ පසමිතුරෝවූහ. වාමාංශික අදහස් ඇති සමසමාජ කාරයෝ සහ ශ්‍රීලංකාකාරයෝ එක පිලකට වූ අතර UNP කාරයන් මොවුනට එරෙහිව හුදෙකලා සටනක නිරත වූහ. මහින්දගේ ගෙදර කොමියුනිස්ට් වාමාංශික පොත පත එකතු කර ඇති විශාල පොත් රාක්කයක් තිබු බව මට මතකය. පියසේන මහත්තයා කොමියුනිස්ට් මූලධර්ම වාදියකුවූ අතර දරුවන්ද ඒ ආභාෂය ලැබීම නිසා සුනන්ද දේශප්‍රිය 71 කැරැල්ලේ ප්‍රධාන සැකකරුවකු බවට පත්විය. පසුව ඔහු යුක්තිය පුවත්පතේ කතුවරයාවූ වූ අතර දක්ෂ මාධ්‍යවේදියකු බවට පත්විය. මම කනිෂ්ඨ ශිෂ්‍යභට කණ්ඩායමේ සාමාජිකයකු වූ අතර නිතර යුධ සහ කව්බෝයි චිත්‍රපටි බොන්ඩ් චිත්‍රපටි නරඹන, ඩීමන් ආනන්දගේ මාරක කතා කියවන මිලිටරි මානසිකත්වයක් ඇති ගැටවරයෙක් විය. රන්ජිත් පී විතාන (තවමත් ජීවතුන් අතර සිටී මට මෑතකදී මුණගැසුණි) මගේ කැඩෙටින් ගුරුවරයා විය. Guns of Navarone , For a few dollars more, The Good the Bad & the Ugly, Tora Tora Tora වැනි කව්බෝයි සහ බිහිසුණු යුධ චිත්‍රපටි නැරඹීමට මම අතිශය ප්‍රිය කලෙමි. රන්ජිත් සර්ද බටහිර චිත්‍රපට ලෝලියකු වූ අතර ඔහු යුධ චිත්‍රපට නැරඹීමට කනිෂ්ඨ ශිෂ්‍ය භටයන් වූ අප උනන්දු කළේය. ඔහුගේ යොමු කිරීම් සාර්ථක වූ අතර මගේ සමකාලීන බ්‍රිගේඩියර් සනත් කරුණාරත්න වැනි යුධ වීරයන් අප පාසැලින් බිහිවිය. ක්ලින්ට් ඊස්ට්වුඩ්, චාර්ල්ස් බ්රොන්සන්, රොජර් මුවර්, ෂෝන් කොනරි, මාලන් බ්‍රැන්ඩෝ, උර්සුලා ඇන්ඩ්රෙස්,බෲස් ලී මා ප්‍රිය කල නළු නිලියන් කිහිප දෙනෙකි. දැනුත් මම මේ පැරණි විශිෂ්ඨ චිත්‍රපටි නැවතත් නරඹමි. ගෙදරදී මම තනිවම නිදාගත් අතර රාත්‍රී කාලයේ ජනේලෙන් හොරෙන් පැනගොස්, සත 55ක් ගෙවා ගංජා කාරයන් අතරටවී 9:30 ෂෝඑක බලමින් ගත් ආතල් අදත් මතකය.
Great Train Robbery වැනි චිත්‍රපටි නැරඹීම නිසා හොඳ මංකොල්ලකරුවකු සහ ඕනෑම අගුලක් ඇරිය හැකි දක්ෂ හොරෙකුවීමේ ආසාවක්ද මට විය. මම නන්දන බාසුන්නැහේ ගේ ගැරේජ් එකටවී පරණ බඩු කඩෙන් ගත් යේල් ඉබ්බන් කපා ඉක්මනින්ම ඒවායේ ක්‍රියාකාරිත්වය වටහා ගත්තෙමි. ඒ නිසා ඕනෑම තඩි ඉබ්බකු හෝ දොර අගුලක් හොර යතුරකින් ඇරීම මට අදටත් සිම්පල් වැඩකි. 9;30 ෂෝ එක බලා ගෙදර එන ගමන් ලොකු කඩවලට සුමනදාස මුදලාලිගේ පරණ බඩු කඩෙන් ගත් අතිරේක ඉබ්බකු දමා ඒම මගේ සිරිත විය. පසුදා උදේ මගේ මෑණියන්ට පින්දෙමින් හැක්සෝ එකෙන් ඉබ්බාගේ වානේ කම්බිය දාඩිය පෙරාගෙන කපන කඩකාරයා දැක මම මහත්සේ ප්‍රීතියට පත් උනෙමි. වාර අවසානයේ පැවැත්වෙන සාදවලට අවැසිදේ කලින්දිනයේ මුදල් එකතුකර ගෙනැවිත් කබඩ්වල දමා යෑම කෙල්ලොන් ගේ සිරිත විය. මට මේ කෙල්ලන් පෙනුනේ වැඩකට නැති, මොනම කාර්මික දැනුමක් නැති දුර්වල සත්තු ජාතියක් ලෙසටය. මගේ චෞර මිතුරා ගජනායක සමග පැමිණ ෆයිල් කටුවකින් ඉබ්බා ඇර බිස්කට් කෝඩියල් බෝතල් කෙසෙල්ගෙඩි පැහැරගෙන අපි සිත්සේ කෑවෙමු. පිනා මෙයින් කුපිතවූ අතර ඉබ්බා නොඇර මේවා අතුරුදහන්වූ හැටි නොදැන කෙල්ලෝ මවිතවූහ. එසෙම්බ්ලි එකේදී මේ හොරා ගැන සෙවිල්ලෙන් සිටින ලෙස සියළුම ශිෂ්‍යන්ට පප්පා සර් උපදෙස් දුන්නේය. අල්ලයි මගෙ වලිගෙ. 
               මේ අතර 71 අප්‍රේල් කැරැල්ල සමාජයේ යටි ස්ථරයෙන් මෝරා යමින් තිබුණි. මෝඩ සිරිමාගේ ආණ්ඩුවට වෙන්නට යන්නේ කුමක්දැයි මෙලෝහසරක දැනුමක් නොතිබිණි. අම්බලන්ගොඩ ධර්මාශෝකය 71 කැරලි කරුවන්ගේ තිප්පලක් විය. පාසැලේ එහා කෙලවරේ කොරියාවේ හවසට සුනන්ද දේශප්‍රියලා මුර දාගෙන පංති පහ පවත්වන බව විදුහල්පති එම් ඩී විමලසූරිය මහතාටද ඉවවැටී තිබුණි. මහින්ද දේශප්‍රියද අයියාගේ මල්ලටම වැටී තිබූ අතර විප්ලව අදහස් ශිෂ්‍යන් අතර පතුරවමින් සිටියේය. විජේවීරගේ මීටින් වලදී ඇසූ කතා වලට මම වශීවුනු අතර UNP එකට වෛර කිරීමට පටන්ගත්තෙමි. මාර්ග ආයතනය විසින් ප්‍රකාශයට පත්කල සියලු සෝවියට් නවකතා අදටත් පොත්ගුල්ලකුවූ මම කියවා තිබුනෙමි. විප්ලවයට සම්මාදම් වීමේ තදබල ආශාවක් මටද විය. මේක වටහාගත් මහින්ද හොඳ වැඩකාරයකුවූ මට දවසක් වැඩක් බාරදුන්නේය. හෙට උදේට අපි ඉස්කෝලේ JVP පෝස්ටර් ගහනවා පාප්ප හදාගෙන උදේ 6ට කලින් ඉස්කෝලේ උඩතට්ටුවට නගින පඩිපෙළට වරෙන්...#මතු සම්බන්ධයි#

Saturday, 12 May 2018

මහළු දිවියට මගෙන් උපදෙස්

මහළු දිවියට මගෙන් උපදෙස්...
(1) ගෙදරින් පිටත්වීමට පෙර... 
ඇඳන් ඉන්නේ ටීෂර්ට් එකේ නිවැරදි පැත්ත දැයි බලන්න
(2) කලිසමේ සිප්එක දිහා බලන්න හ..හ...හා 
(3) ගෙදරින් පිටත්වනවිට පර්ස් එක ෆෝන් එක ගත්තා දැයි බලන්න 
(4) ගෙදර එන්නට පෙර පර්ස් එක ෆෝන් එක තිබේදැයි බලන්න 
(5) ගෙදර ආපසු ඔයදෙක තියන්නට නිශ්චිත තැනක් හදාගන්න 
(6) ATM එකෙන් කාඩ්එක ගත්තාදැයි බලන්න
(7) උදන්ම කරන්නට ඇති වැඩ ලැයිස්තුව ලියාගන්න (මම දිනපතාම කරන වැඩකි )
(8) ටවුමට ගිය පසු නෝනා බාරදුන්නු අනිවාර්ය රාජකාරි සියල්ලම කරාදැයි ලැයිස්තුව පිරික්සන්න 
(9) 70ට වැඩිනම් තමන් ආසා කෑම බීම ඕනෑම එකක් පොඩි පාලනයක් ඇතුව කන්න 
(10) තමන්ට ඇති දේපල තමන් මියගිය පසුව පමණක් අයිති වන ලෙස ළමයින්ට සාධාරණව බෙදා දෙන්න 
(11) තමන් ඉතිරි කර ඇති මුදල්සියල්ලම දරුවන්ගේ වැඩ වලට වියදම් නොකරන්න (ඉතාම වැදගත්) 
(12) ලොකු TV එකක් අරං තමන් කැමති දෙස් විදෙස් චිත්‍රපටි බලන්න, සංගීතයට සවන් දෙන්න පොත් කියවන්න. (ඩිප්රෙෂන් ලොවෙත් හැදෙන්නේ නැත, තනිකමක් දැනෙන්නෙත් නැත)
(13) හැකි තරම් පැරණි මිතුරන් හමුවන්න. ඔවුන්ගේ ප්‍රශ්ණ වලට ඇහුන්කම් දෙන්න
(14) දිනපතා ඇවිදින්න
(15) බයිසිකලයක් ගන්න කෙටි දුරවල් බයිසිකලයෙන් යන්න. එය (ඔබේ නම්බුවට බාධාවක් නොවේ) 
(16) පාන්පිටි ආහාර ඔබට තහනම්ය. පාන්,බත් කොත්තු, පරාටා, ගෝදම්ඹරොටි, රෝල්ස්, මාළුපාන්, පේස්ට්‍රි,කේක්,අයිස්ක්‍රීම්, පැණිරස කැවිලි ජාති, කිඹුලා බනිස් කෑමෙන් සම්පූර්ණ යෙන්ම වැළකෙන්න. සීනි යනු භයානක වස වර්ගයකි. පාන්පිටි, බත් සහ අධික සීනිභාවිතය හෘද රෝග වලට මූලික හේතුවකි. බිත්තර, බේකන්, බටර් ඔබට කිසිසේත්ම ඔබට අගුණ නැත. ඒවා නිසා කොලෙස්ටරෝල් හැදෙන්නේ නැත (නවතම පර්යේෂණ අනුව). ඒවා රසවිඳින්න. 
(17) දවල් කෑමවේල සම්පූර්ණ යෙන්ම මග හරින්න. කොම්පියුටරේ ලැගලා ඉන්න එකෙකුට බත් පිඟන් තුනක් හොඳටෝම වැඩිය. බඩ නෙරා එන්නේ ඒකය. බර වැඩ නොකරන කෙනෙකුට දිනකට කෑමවේල් දෙකක් හොඳටම ප්‍රමාණවත්ය. දවල්ට කෙසෙල් ගෙඩි දෙකක් හෝ තමන් කැමති පළතුරක් කන්න (පීප්ප වැනි බඩගෙඩියන්ට විශේෂයි). කෑම වේලේ ඇති බත්ප්‍රමාණය අඩුකර එළවළු,මාළු ප්‍රමාණය, වැඩිකරන්න. මෙසේකලොත් බඩගෙඩිය බලන් ඉද්දී අඩුවනු ඇත. 
(18) ලෙඩ රෝග තිබේනම් ඒගැන අන්තර් ජාලයේ ඇති නවතම කරුණු පිරික්සා බලන්න. බොහොමයක් ලංකාවේ චැනල් මුදලාලිලාට තම දැනුම අප්ඩේට් කරගැනීමට වෙලාවක් නැත. ඔව්හු වට්ටෝරු වෙද්දුය. ඔවුන් නියම කරන බෙහෙත්ගැන අන්තර්ජාලයේ විමසීමක් නොකර එක දිගට නොගන්න. ඔව්හු බෙහෙත් වල භයානක අතුරු ප්‍රථිපල ගැන ඔබට කිසිවක් කියන්නේනැත. 
(21) තමන්ට විසඳීමට බැරි ප්‍රශ්ණ ගැන සිතමින් ලත නොවන්න. පූජ්‍ය පක්ෂයට හෝ ගුප්තශාස්ත්‍ර පකීර්ලාට ඒවා විසඳාදිය නොහැකිය. ඒවා කාලය විසින් විසඳනු ඇත. 
(22) දිනපතා මල්ටි විටමින්, ෆිෂ්ඔයිල් කැප්සියුල් එකක්, ඇස්පිරින් පෙති බාගයක් ගන්න (වයසට යනවිට ආහාර වල ඇති විටමින් ශරීරයට උරාගැනීම අඩුවෙයි) 
(23) මාසෙකට අඩුම තරමින් දිනක් දෙකක් උපවාසයේ යෙදෙන්න (ශරීරයේ තැන්පත්වී ඇති මේදය දහණය වීම සඳහා intermittent fasting ) 
(24) රෑට මත්පැන් ඉතාම ස්වල්පයක් හෝ වයින් ටිකක් බොන්න. සුව නින්දක් ලැබෙනු ඇත (කණපැලෙන්න බොන්න එපා යකෝ).
25) දුම්බීමෙන් වලකින්න
(26) තමන්ගේ වැඩිහිටි දරුවන්ගේ වැඩවලට අනවශ්‍ය ලෙස මැදිහත් නොවන්න.
(27) මුණුපුරු මිණිපිරියන් සමග හැකිතරම් කාලයගතකරන්න. ඔබගේ ජීවන අත්දැකීම් ඔවුන්ට කියන්න. ඔවුන්ට ඒවායින් පාඩම් ඉගෙනගන්න කියන්න. ඔබේ දැණුම ගුරුමුෂ්ඨි ඔවුන්ට දෙන්න.. මේ සමාජයේ ඇති විෂඝෝර වනසතුන් වැනි මිනිසුන්ගෙන් බේරී ජීවත්වන අන්දම ඔවුන්ට කියාදෙන්න
(28) කිසිම කෙනෙකුට ණයට මුදල් නොදෙන්න. දේපල උගසට තබා බැංකුවලින් විශාල ණය ගෙන අවදානම් ආයෝජන නොකරන්න. එසේ කළහොත් අන්තිමට ඉන්නවෙන්නේ කොට්ටම්බා ගසක් යටය. 
(29) වැඩකට නැති සමිති සමාගම් වලින් ඉවත්වන්න. ඉතාම සීමිත යහළුවන් නෑයින් කිහිපදෙනෙක් පමණක් ලඟින් ආශ්‍රය කරන්න. වැඩකට නැති හාල්පාරුවන් කපාහරින්න 
(30) කිසිම දවසක නොගිය තැන් සහ අතීත මතක සැමරුම් ඇති තැන් බලන්නට යන්න. මුදල් යහමින් තිබේ නම් මේ යක්ෂ දූපතෙන් එලියට ගොස් සංචාරය කරමින් ජීවිතයේ ඉතිරි කොටස රස විඳින්න
## Some People Are Born Old ##


LikeShow more reactions

Thursday, 15 March 2018

පිටි ගුලියකින් වැසූ මහා මංකොල්ලය

හොර තක්කඩි දේශපාළුවෝ සහ ජන්දදායකයෝ....


ඔබ මේ පින්තූරයේ ඉන්නා මිනිසා කව්දකියා හොඳින්ම දන්නවා. ඔහු මේ රටේ මහජනතාවගේ මුදල්...රුපියල් බිලියන12ක් මහදවල් මංකොල්ලකා රටින් පලාගිය මිනිහෙක්. මේ මුදල් සියල්ල ලංකාවේ රජයට නැවත කිසිදා නොලැබෙනු ඇති. පිටි ගුලියක් නිසා ඇතිවූ මුස්ලිම් සිංහල කෝලාහලය ඇතිකලේ...මේ හොරකම සහ විශ්වාසභංගය වසා දමන්නට බව මෝඩ මිනිසුන්ට තේරෙන්නේ නැත. මොහු මහ බැංකුවේ අධිපතිකොට පත් කර මේ හොරකම බළල් අන්ඩ දමා සිදුකල හොරා අදටත් රටේ අගමැති ලෙස සිටිනවා....රටේ කිසිවකුට මේ ගැන වගේ වගක් නැත. ඉස්පිරිතාලෙක මිනිහෙකුට පහරදුන්විට පාරටපැන ටයර්පුච්චන මිනිස්සු...මේගැන නොදන්නාසේ සිටිති. මහා පුදුමයකි...කොළපාට කන්නාඩිය දාගත් එකාට රනිල්කල මේ මහා හොරකම පෙනෙන්නේ නැත. ඔවුන්ට අගමැති රනිල් මහා මොළ කරුවෙකි Mr Clean කෙනෙකි. නිල්පාට කන්නාඩිය දාගත් එකාට මහින්ද රාජපක්ෂ සහ සහෝදරයෝ කල මහා හොරකම් මිනීමැරුම් එකක්වත් පෙනෙන්නේ නැත. ඔවුන්ට ඔහු මහා දේශප්‍රේමියෙකි.රනිල් සහ මහින්ද සම්මන්ත්‍රණයකදී එකළඟ වාඩිවී සිනාසෙමින් සුහදව කතාකරමින් සිටින අන්දම රූපවහිණියෙන් දුටුවෙමි. ඔවුන් සිනාසෙන්නේ ඔවුන් දෙවිවරුන් සේ සිතාසිටින මේරටේ මහජනතාවටය. රනිල් සිරිසේන හවුල් ආණ්ඩුව...මහින්ද, පුතුන් සහ සහෝදරයන් අල්ලා හිරේ දමනතුරු UNP කාරයෝ බලාසිටිති. හොරු රංචු දෙකක් නොව ඇත්තේ එකම හොරුරංචුවක් බව ජහමනයාට වැටහෙන්නේ නැත. උන් පිල් වලට ජාති වලට ආගම් වලට බෙදී කා කොටාගෙන මරා ගනිති...අනෙකාගේ දේපල ගිනිතබති. පාර්ලිමේන්තුවේ මේ බැංකු හොරකමගැන කෑගසන JVP සහෝදරයෝ උසාවියේ වරෙන්තු කරුවකු වන මොහු සොයාගෙන එනමෙන් නීතීඥ වරයකු වන අගමැතිට බලකර...පාරට බහින්නේ නැත. දැන් ෆේස් බුක් ආදී සමාජජාලා  වසාදමා මහජනයාගේ කටට පිටිගුලියක් ඔබා තිබේ. අයියන්ඩී...අහෝ මේ කුමන වර්ගයේ රාජ්‍යයක්ද ?